MAS MAHIGPIT NA HAKBANG LABAN SA DAGA, IPINATUTUPAD SA BAGUIO CITY PUBLIC MARKET

BAGUIO CITY | Mas pinalalakas ng Pamahalaang Lungsod ng Baguio ang kampanya laban sa pagdami ng daga sa Baguio City Public Market sa pamamagitan ng mas mahigpit na paglilinis at pagpapatupad ng mga patakaran sa kalinisan.

Ayon kay Ma. Guadalupe C. Della, Assistant Head ng City General Services Office (GSO), malaki pa rin ang problema sa daga sa palengke dahil may mga bahagi na pinamumugaran pa rin ng mga ito. Sinabi niyang patuloy na nakikipagtulungan ang mga vendor at nagbigay rin ang GSO ng improvised drowning drums upang makatulong sa paghuli ng mga daga.

Sa ilalim ng utos ni Mayor Benjamin Magalong, aalisin na ang pagbibigay ng insentibo sa mga vendor para sa kalinisan. Sa halip, maaaring ipasara nang hanggang isang linggo ang mga bahagi ng palengke na patuloy na may problema sa daga upang maisagawa ang pest control. 

Matatandaang ipinatupad din ni Mayor Magalong ang araw-araw na paglilinis sa iba't ibang block ng Baguio City Public Market bilang bahagi ng kampanya ng lungsod upang mapanatili ang kalinisan sa pamilihan. 

Patuloy rin ang pangongolekta ng basura at inspeksyon sa palengke. Gayunman, sinabi ng mga opisyal na nananatiling problema ang hindi tamang pagtatapon ng basura, na nagiging dahilan ng pagdami ng mga daga.

Umaasa ang lokal na pamahalaan na sa tulong ng mas mahigpit na pagpapatupad ng mga patakaran at pakikiisa ng mga vendor, mababawasan ang problema sa daga at mapapanatiling malinis at ligtas ang Baguio City Public Market. Via Jody Lardizabal and Marielle Martin, TAU DEVCOM Interns.