MAS MASUSING IMBESTIGASYON IPINAG-UTOS SA SUNOG SA KAGUBATAN SA LOAKAN

BAGUIO CITY – Nag-utos si Mayor Benjamin Magalong ng mas masusing imbestigasyon kaugnay ng sunog sa kagubatan na naganap noong May 8, 2026 sa Camp Cawa, Sitio Ongasan, Loakan Proper. Ayon sa paunang imbestigasyon ng Baguio City Fire Station (BCFS), posibleng nagsimula ang sunog dahil sa kaingin o slash-and-burn na isinagawa sa paglilinis ng lupa. Humigit-kumulang isang ektarya ng kagubatan na pagmamay-ari ng isang pribadong korporasyon ang naapektuhan, kabilang ang ilang malulusog na puno. Wala namang naitalang nasawi o pamilyang naapektuhan sa insidente.

Sinabi ni Mayor Magalong na mahalagang matukoy ang eksaktong sanhi ng sunog at mapanagot ang sinumang mapatunayang nagkaroon ng kapabayaan o lumabag sa batas, lalo na't mahalaga ang mga nasunog na puno sa pangangalaga ng kalikasan ng lungsod. Batay sa ulat ng BCFS, ang kaingin ay isinasagawa sa pamamagitan ng pagputol at pagpapatuyo ng mga puno, damo, at iba pang halaman bago ito sunugin upang ihanda ang lupa para sa pagsasaka. Pinaniniwalaang ang nakasinding apoy mula sa nasusunog na tuyong halaman ang naging sanhi ng pagkalat ng apoy sa kagubatan. Naiulat ang sunog bandang 2:47 p.m., nakontrol ito 5:18 p.m., at tuluyang naapula 5:32 p.m.

Bagama't inirekomenda ng BCFS na pansamantalang isara ang kaso habang wala pang bagong ebidensya, maaari itong muling buksan kapag may mapagkakatiwalaang testigo o karagdagang impormasyon na magtuturo sa responsable. Kapag nakilala ang may sala, maaari silang maharap sa kasong paglabag sa Republic Act No. 9003, partikular sa Section 48, Paragraph 3, na nagbabawal sa pagsusunog ng solid waste sa bukas na lugar. Muling iginiit ng Pamahalaang Lungsod ng Baguio ang pangako nitong pangalagaan ang kagubatan at hinikayat ang publiko na iwasan ang mga gawaing maaaring magdulot ng sunog at agad na iulat ang anumang insidente sa mga kinauukulang awtoridad.  via Christine Agbuya; TAU-DevCom Intern.