MGA NEGOSYO IPINASARA DAHIL KULANG ANG PERMIT AT LABAG SA KALINISAN

BAGUIO CITY – Mas pinaigting ng Pamahalaang Lungsod ng Baguio ang kampanya laban sa mga negosyong hindi sumusunod sa mga umiiral na regulasyon sa permit, kalinisan, at tamang paggamit ng pampublikong espasyo. Isinasagawa ang mga inspeksyon sa pangunguna ng Permits and Licensing Division, katuwang ang City Health Services Office, City Buildings and Architecture Office, City Environment and Parks Management Office, City Engineering Office, Bureau of Fire Protection, at iba pang law enforcement agencies. Layunin ng hakbang na matiyak ang kaligtasan ng publiko, mapanatili ang kaayusan sa lungsod, at matiyak na lahat ng negosyo ay patas na sumusunod sa mga itinakdang batas at ordinansa.

Noong June 30, nagsagawa ng magkasanib na inspeksyon ang mga awtoridad sa Barangay Dontogan at Bakakeng Central. Bunga nito, 32 pwesto sa Dontogan at walong pwesto sa Bakakeng Central ang ipinasara noong July 1 matapos napatunayang walang kaukulang business permit, may hindi maayos na sanitation practices, at may mga istrukturang nakaharang sa mga pampublikong kalsada at easement. Noong July 2, ipinagpatuloy ang inspeksyon sa iba pang mga tindahan at pamilihan, kung saan may ilang negosyo ang napag-alamang nagpoproseso pa lamang ng permit, habang ang iba naman ay nagbebenta ng mga produkto at serbisyo na hindi saklaw ng kanilang business permit. Pinayuhan ang mga may-ari na agad itama ang kanilang mga paglabag upang makaiwas sa karagdagang parusa.

Ayon sa pamahalaang lungsod, bahagi ang operasyon ng mas malawak na kampanya upang mapataas ang antas ng pagsunod ng mga negosyo sa mga lokal na regulasyon. Bukod sa permit at kalinisan, sinusuri rin ng mga awtoridad ang fire safety compliance, waste management, zoning regulations, at tamang paggamit ng mga pampublikong lugar. Nilinaw ng lungsod na hindi layunin ng operasyon na isara ang mga negosyo, kundi hikayatin ang mga ito na maging legal, ligtas, at responsable sa kanilang operasyon. Patuloy ring magsasagawa ng mga regular at surprise inspections sa iba't ibang barangay upang matiyak ang maayos na pagpapatupad ng mga batas at mapanatili ang kaayusan at kaligtasan sa Baguio City. via Christine Agbuya; TAU-DevCom Intern