BAGUIO LGU PINAG-AARALAN ANG ACTIVE SHOOTER DRILLS SA MGA PAARALAN

BAGUIO CITY | Patuloy na pinag-aaralan ng lokal na pamahalaan ng Baguio ang mga hakbang upang mapanatiling ligtas ang mga paaralan, kabilang ang pagpapatupad ng active shooter drills at pakikipag-ugnayan sa iba't ibang sektor.

Ayon kay Mayor Benjamin Magalong,may mabuti at hindi mabuting epekto ang labis na paggamit ng mobile phones ng mga estudyante. Dahil dito, isinama ang usaping ito sa isinagawang pagpupulong ng Local School Board noong nakaraang linggo bilang bahagi ng mga hakbang upang mapanatili ang kaligtasan sa loob ng mga paaralan.

Isa sa mga pangunahing pinag-uusapan sa pulong ang pagpapatupad ng active shooter drills, na kasalukuyan pang pinag-aaralan kung paano maayos na maisasagawa sa mga paaralan.

Bukod dito, pinalalakas din ng lokal na pamahalaan ang pakikipag-ugnayan sa mga Parent-Teacher Associations (PTA) at mga psychologist upang matugunan ang mga problemang kinahaharap ng mga mag-aaral.

Ayon pa kay Mayor Magalong, mahalagang matukoy at matugunan ang ugat ng mga suliranin upang makabuo ng mas epektibong paraan sa pagpapanatili ng kaligtasan at maayos na kapaligiran sa mga paaralan.

Patuloy namang nakikipagtulungan ang lokal na pamahalaan sa mga paaralan at iba pang sektor upang maisulong ang mga programang magbibigay ng mas ligtas na komunidad para sa mga estudyante.via Jody Grace Q. Lardizabal and Marielle Joyce L. Martin, TAU DevCom Interns