BAGUIO CITY — Itinuturing ngayon ng mga health officials na isa sa mga salik sa pagkalat ng Human Immunodeficiency Virus (HIV) sa lungsod ang paggamit ng online dating applications. Ayon sa mga eksperto sa kalusugan, mas napapadali ng mga digital platform ang paghahanap at pakikipag-ugnayan sa mga posibleng sexual partner, na maaaring magdulot ng mas mataas na panganib ng impeksiyon kapag hindi nasusunod ang ligtas na pakikipagtalik.

Batay sa datos ng mga awtoridad, umabot na sa humigit-kumulang 800 ang naitalang HIV cases sa Baguio City, kung saan nasa 70 porsiyento ng mga kaso ay mga residente ng lungsod. Karamihan sa mga naitalang kaso ay kalalakihan, na bumubuo sa 94 porsiyento ng kabuuang bilang. Pinakamarami rin ang mga kaso sa edad na 25 hanggang 34, na sinusundan ng mga nasa edad 15 hanggang 24.

Lumabas din sa isang pag-aaral noong 2022 na maraming HIV infections ang may kaugnayan sa casual sexual encounters na nagsimula sa pamamagitan ng online platforms. Gayunman, nilinaw ng mga health officials na hindi direktang sanhi ng HIV ang dating apps. Sa halip, ang malawak na paggamit ng mga ito ay nagpapadali lamang sa pagkakaroon ng mga bagong partner, na maaaring magpataas ng risk ng transmission kapag walang sapat na proteksiyon.

Samantala, mahigit kalahati ng lahat ng HIV cases sa rehiyon ng Cordillera ay naitatala sa Baguio City. Ayon sa mga awtoridad, isa sa mga dahilan nito ang mas aktibong testing at detection efforts sa lungsod. Dahil dito, hinihikayat ang publiko na magpa-HIV test, magsagawa ng safe sex practices, at agad na magpagamot kung kinakailangan. Nananatili ring bukas ang iba’t ibang treatment hubs at support services upang matulungan ang mga apektadong indibidwal. via Noli Kristian Salio, IFM NEWS BAGUIO.